DataLife Engine / #Биласизми Ходимларнинг шахсий автомобилларидан хизмат мақсадлари учун (хизмат сафарларидан ташқари) фойдаланганлик учун компенсация тўланадими?

#Биласизми Ходимларнинг шахсий автомобилларидан хизмат мақсадлари учун (хизмат сафарларидан ташқари) фойдаланганлик учун компенсация тўланадими?

ЎЗБЕКИСТОН РЕСПУБЛИКАСИ ВАЗИРЛАР МАҲКАМАСИНИНГ
ҚАРОРИ
БЮДЖЕТДАН МАБЛАҒ БИЛАН ТАЪМИНЛАНАДИГАН ТАШКИЛОТЛАРДА ХИЗМАТ ЕНГИЛ АВТОТРАНСПОРТИДАН ФОЙДАЛАНИШНИ ТАРТИБГА СОЛИШ ТЎҒРИСИДА

Хизмат енгил автомобиль транспорти паркини мақбуллаштириш ва ундан фойдаланиш самарадорлигини ошириш, автомобилларни сақлаш ва улардан фойдаланиш харажатларини камайтириш, шунингдек бюджетдан маблағ билан таъминланадиган ташкилотларда хизмат енгил автотранспортидан фойдаланиш устидан назоратни кучайтириш мақсадида Вазирлар Маҳкамаси қарор қилади:
1. 1999 йил 1 апрелдан бошлаб вазирликлар, идоралар ва давлат бюджетидан маблағ билан таъминланадиган ташкилотлар бўйича хизмат енгил автотранспорти сони 55 фоизга қисқартирилсин. Бириктириладиган енгил автотранспортнинг умумий чекланган сони 2067 та, шу жумладан шахсан бириктирилган автомобиллар сони 1050 та ва навбатчи автомобиллар сони 1017 та этиб белгилансин.
2. Хизмат енгил автомобиллари:
вазирлар, давлат қўмиталари, идоралар ва бюджет маблағлари ҳисобига маблағ билан таъминланадиган бошқа республика жамоат ташкилотлари ва органлари раҳбарлари, шунингдек уларнинг ўринбосарларига;
Олдинги таҳрирга қаранг.

Қорақалпоғистон Республикаси Вазирлар Кенгаши Раиси, вилоятлар ва Тошкент шаҳар ҳокимлари, шаҳарлар ва туманлари ҳокимлари, уларнинг биринчи ўринбосарлари ва ўринбосарлари, бюджетдан маблағ билан таъминланадиган вилоят тузилмалари раҳбарларига шахсан бириктирилсин.
(2-банднинг учинчи хатбошиси Ўзбекистон Республикаси Вазирлар Маҳкамасининг 2017 йил 7 мартдаги 123-сонли қарори таҳририда — ЎР ҚҲТ, 2017 й., 10-сон, 147-модда)
3. Балансда ҳисобда турган автомобиллар ҳисобига Молия вазирлиги томонидан белгиланадиган нормативлар бўйича Қорақалпоғистон Республикаси Вазирлар Кенгашига, вилоятлар ва Тошкент шаҳар ҳокимликларига, вазирликлар, идоралар ва уларнинг вилоят тузилмаларига навбатчи енгил автомобиллар, шунингдек туман ва шаҳар молия ва солиқ органларига, халқ таълими органларига биттадан енгил автотранспорт назарда тутилсин.
4. Ўзбекистон Республикаси Молия вазирлигининг 1999 йил 1 апрелдан бошлаб:
Олдинги таҳрирга қаранг.
(4-банднинг иккинчи хатбошиси Ўзбекистон Республикаси Вазирлар Маҳкамасининг 2011 йил 26 майдаги 153-сонли қарорига асосан чиқарилган)
хизмат автомобиль транспортининг йўл босиш йиллик лимити ва бюджет ташкилотларининг навбатчи енгил автотранспортдан фойдаланиш нормативларини 2-иловага мувофиқ;
ходимларнинг шахсий автомобилларидан хизмат мақсадлари учун фойдаланганлик учун ҳар ойда компенсация тўлаш тартибини 3-иловага мувофиқ белгилаш тўғрисидаги таклифига розилик берилсин.
5. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, вазирликлар, идоралар, бюджетдан маблағ билан таъминланадиган ва балансида енгил автомобиллар бўлган муассасалар ва ташкилотлар:
Ўзбекистон Республикаси Ички ишлар вазирлигининг Давлат автомобиль назорати бошқармаси билан биргаликда фойдаланишга яроқли бўлган хизмат енгил автомобилларни бир ой муддатда хатловдан ўтказсинлар;
хатлов натижалари бўйича белгиланган чекланган миқдордан ортиқча бўлган ва ким ошди савдоси асосида биржа орқали сотиладиган автомобиллар рўйхатини белгиласинлар;
бўшаб қолган енгил автомобиллар белгиланган тартибда 1999 йил 1 июлгача сотилишини таъминласинлар ва тушган маблағларни республика бюджетидан маблағ билан таъминланадиган ташкилотлар бўйича республика бюджети даромадига, маҳаллий бюджетдан маблағ билан таъминланадиган ташкилотлар бўйича маҳаллий бюджет даромадига ўтказсинлар.
6. Ўзбекистон Республикаси Макроиқтисодиёт ва статистика вазирлиги «Ўзнефтмаҳсулот» акциядорлик компанияси билан биргаликда Ёқилғи-энергетика ресурсларини иқтисод қилиш республика комиссияси томонидан тасдиқланган 100 км йўл босишга ёнилғи сарфининг базис линия нормаларига ва мазкур қарор билан тасдиқланган автотранспорт воситалари йиллик лимити нормаларига амал қилган ҳолда бюджет ташкилотлари учун хизмат енгил автомобиль транспорти учун нефть маҳсулотлари, суюлтирилган ва сиқилган газга лимитларни икки ҳафта муддатда қайта кўриб чиқсин ва тасдиқласин.
7. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, вазирликлар, идоралар, корхоналар ва ташкилотлар чекланган йўл босишга ва ёқилғи-энергетика ресурсларини сарфлашнинг белгиланган лимитига қатъий амал қилсинлар.
Олдинги таҳрирга қаранг.

8. «Ўзнефтмаҳсулот» акциядорлик компанияси Энергия самарадорлиги ва энергиянинг тикланадиган манбаларини ривожлантириш масалалари бўйича Республика комиссияси ишчи органининг сўровномаси бўйича нефть маҳсулотлари, суюлтирилган ва сиқилган газнинг белгиланган лимитдан ортиқча сарфланиши тўғрисидаги маълумотни кейинчалик ортиқча сарфланишга йўл қўйган корхоналарга жавобгарлик чоралари кўриш бўйича таклифлар киритиш учун тақдим этади.
(8-банд Ўзбекистон Республикаси Вазирлар Маҳкамасининг 2015 йил 13 августдаги 238-сонли қарори таҳририда — ЎР ҚҲТ, 2015 й., 32-сон, 433-модда)
Олдинги таҳрирга қаранг.

9. Белгилансинки, белгиланган лимит доирасида хизматда фойдаланиш учун транспорт воситалари:
Ўзбекистон Республикаси республика бюджетидан маблағ олувчи ташкилотлар томонидан — фақат Ўзбекистон Республикаси Молия вазирлиги билан келишган ҳолда;
Қорақалпоғистон Республика бюджети, вилоятлар ва Тошкент шаҳар маҳаллий бюджетларидан маблағ олувчи ташкилотлар томонидан — тегишли равишда фақат Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан келишган ҳолда сотиб олинади ёки ижара бўйича жалб этилади.
Бюджетдан молиялаштириладиган ташкилотлар ҳар йили харажатлар сметаси ва штат жадвалларини рўйхатдан ўтказишда хизмат автомобиллари сони лимитларини ва уларни сақлаш харажатларини рўйхатдан ўтказишлари шарт.
(9-банд Ўзбекистон Республикаси Вазирлар Маҳкамасининг 2018 йил 6 октябрдаги 805-сонли қарори таҳририда — Қонун ҳужжатлари маълумотлари миллий базаси, 09.10.2018 й., 09/18/805/2013-сон)
10. Бюджетдан маблағ билан таъминланадиган вазирликлар ва идораларнинг махсус автомобилларини таъминлаш ва улардан фойдаланишнинг амалдаги тартиби сақлаб қолинсин.
Олдинги таҳрирга қаранг.

101. Белгилансинки, Ўзбекистон Республикаси Миллий гвардияси, Бош прокуратураси, Ички ишлар вазирлиги, Фавқулодда вазиятлар вазирлиги ва Давлат божхона қўмитаси ихтиёрида бўлган автомототранспорт воситалари, шунингдек, бошқа техника, агрегат ва ускуналар учун ёқилғи маҳсулотларини сарфлаш ва йиллик йўл босиш лимитлари ҳамда хизмат автомобиллари сони меъёрлари тегишлича ушбу давлат органлари томонидан Ўзбекистон Республикаси Молия вазирлиги, Иқтисодиёт ва саноат вазирлиги, Транспорт вазирлиги ва «Ўзнефтмаҳсулот» акциядорлик жамияти билан келишилган ҳолда белгиланади.
(101-банд Ўзбекистон Республикаси Вазирлар Маҳкамасининг 2019 йил 15 февралдаги 135-сонли қарорига асосан киритилган — Қонун ҳужжатлари маълумотлари миллий базаси, 16.02.2019 й., 09/19/135/2622-сон)
11. Мазкур қарорнинг бажарилишини назорат қилиш Бош вазир ўринбосари Б.С. Ҳамидов зиммасига юклансин
Вазирлар Маҳкамасининг Раиси И. КАРИМОВ
Тошкент ш.,
1999 йил 2 апрель,
154-сон

Вазирлар Маҳкамасининг 1999 йил
2 апрелдаги 154-сон 
қарорига
2-ИЛОВА
Битта транспорт билан йўл босиш йиллик лимити ва бюджет ташкилотларининг навбатчи енгил автотранспортдан (махсус автотранспортдан ташқари) фойдаланиш нормативлари тўғрисида
НИЗОМ

1. Мазкур Низом Ўзбекистон Республикаси Вазирлар Маҳкамасининг «Нефть маҳсулотлари, суюлтирилган ва сиқилган газ сотиш тизимини тартибга солиш, улардан фойдаланиш ва автотранспорт воситаларининг ишлатилиши устидан назоратни кучайтириш тўғрисида» 1998 йил 31 декабрдаги 542-сон қарорининг 2-бандига мувофиқ ишлаб чиқилган ва қуйидаги йўл босиш йиллик лимитини белгилайди:

Хизмат кўрсатиш тури

Ишнинг сменалиги (соатларда)Йиллик йўл босиш, кмОйлик йўл босиш, км
Шахсан бириктирилган автотранспортда 2 сменада14365003320
Шахсан бириктирилган автотранспортда 1,5 сменада10277202520
Шахсан бириктирилган автотранспортда 1 сменада7246402240
Навбатчи автотранспортда 2 сменада14277202520
Навбатчи автотранспортда 1,5 сменада10246402240

Олдинги таҳрирга қаранг.

Бунда йўл босиш йиллик лимити:
Қорақалпоғистон Республикаси Вазирлар Кенгаши Раисига, вилоятлар ва Тошкент шаҳри ҳокимликларига, шаҳарлар ва туманлар ҳокимларига шахсан бириктирилган автотранспорт учун 54020 км (ойига — 4911 км) белгиланади;
Қорақалпоғистон Республикаси Вазирлар Кенгаши Раисининг, вилоятлар ва Тошкент шаҳри ҳокимликларининг, шаҳарлар ва туманлар ҳокимларининг биринчи ўринбосарларига ва ўринбосарларига шахсан бириктирилган автотранспорт учун 36036 км (ойига — 3276 км) белгиланади.
(1-банд Ўзбекистон Республикаси Вазирлар Маҳкамасининг 2017 йил 7 мартдаги 123-сонли қарорига асосан хатбошилар билан тўлдирилган — ЎР ҚҲТ, 2017 й., 10-сон, 147-модда)

Олдинги таҳрирга қаранг.

2. Вазирликлар, давлат қўмиталари, идоралар, муассасалар, ташкилотлар ва ҳокимликларга (шаҳар ва туман ҳокимликлари бундан мустасно) ходимлар сонидан келиб чиққан ҳолда навбатчи машиналар учун қуйидаги нормативлар белгиланади:
(2-банднинг биринчи хатбошиси Ўзбекистон Республикаси Вазирлар Маҳкамасининг 2017 йил 7 мартдаги 123-сонли қарори таҳририда — ЎР ҚҲТ, 2017 й., 10-сон, 147-модда)

Ходимлар сони

Автомобиллар сони

100 кишигача

1

100 дан 200 гача

2

200 дан 300 гача

3

300 ва ундан ортиқ

4


3. Вазирликлар, давлат қўмиталари, идоралар, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари хизмат автотранспортининг белгиланган ойлик йўл босиш лимитларига қатъий амал қилишлари керак.
4. «Ўзнефтмаҳсулот» акциядорлик компанияси бюджет ташкилотларининг автотранспортлари учун нефть маҳсулотлари, суюлтирилган ва сиқилган газга лимитлар ажратишда Ёқилғи-энергетика ресурсларини иқтисод қилиш Ҳукумат комиссиясининг 1994 йил 28 октябрдаги қарори билан тасдиқланган 100 км йўл босишга ёқилғи сарфининг базис линия нормаларига ва автотранспорт воситаларининг мазкур Низомда кўрсатилган йўл босиш йиллик лимити нормаларига амал қилиши шарт.
5. Ўз автотранспорт воситаларини суюлтирилган ва сиқилган газга ўтказаётган вазирликлар, давлат қўмиталари ва идораларни рағбатлантириш мақсадида уларга белгиланган йўл босиш лимитини 10 фоиздан ортиқ бўлмаган миқдорга оширишга рухсат этилади.
6. Бюджет ташкилотларига хизмат кўрсатувчи автокорхоналар раҳбарларига автотранспортнинг йўл босиши белгиланган лимитдан ошиб кетганда кўрсатиб ўтилган муассасалар ва ташкилотларга хизмат кўрсатиш учун автотранспорт воситаларини чиқариши тақиқланади.
7. Автокорхоналар раҳбарлари мазкур Низомнинг 6-бандини бузганлиги учун, чоракка белгиланган йўл босиш лимити ишлатиб бўлинганда хизмат кўрсатиш учун автомобиль беришни давом эттирсалар қонунчиликда белгиланган тартибда шахсан жавоб берадилар.
8. Вазирликларга, давлат қўмиталари ва идораларга, муассасалар ва ташкилотларга ҳар қайси хизмат автотранспорт воситаси бўйича чорак учун белгиланган лимитни муддатдан олдин фойдаланилганда, келгуси чоракнинг бошланишига қадар ундан фойдаланиш қатъий тақиқланади.
9. Автокорхоналар раҳбарлари чораклик йўл босиш лимити ишлатиб бўлинган автомобилларни аҳолига хизмат кўрсатиш учун такси сифатида фойдаланишга ҳақли.

Вазирлар Маҳкамасининг 1999 йил
2 апрелдаги 154-сон 
қарорига
3-ИЛОВА
Ходимларнинг шахсий автомобилларидан хизмат мақсадлари учун (хизмат сафарларидан ташқари) фойдаланганлик учун компенсация тўлаш
ТАРТИБИ

1. Мазкур Тартиб Ўзбекистон Республикаси Вазирлар Маҳкамасининг «Нефть маҳсулотлари, суюлтирилган ва сиқилган газ сотиш тизимини тартибга солиш, улардан фойдаланиш ва автотранспорт воситаларининг ишлатилиши устидан назоратни кучайтириш тўғрисида» 1998 йил 31 декабрдаги 542-сон қарорининг 2-бандига мувофиқ ишлаб чиқилган ва ходимларнинг шахсий автомобилларидан хизмат мақсадлари учун (хизмат сафарларидан ташқари) фойдаланганлик учун компенсация миқдори ва уни тўлаш тартибини белгилайди.
2. Компенсация, мулкчилик шаклларидан қатъи назар, корхоналар, муассасалар ва ташкилотларнинг ишлаб чиқариш фаолияти мунтазам транспортда юриш (хизмат сафарларидан ташқари) зарурияти билан боғлиқ бўлган ва ушбу мақсадлар учун ўз шахсий енгил автомобилларидан фойдаланадиган ходимларига тўланади.

Олдинги таҳрирга қаранг.

3. Компенсация тўлаш харажатлари хизмат енгил автомобилларини сақлаш учун назарда тутилган бюджетдан ажратиладиган маблағлар суммасининг 30 фоизи доирасида амалга оширилади.
(3-банднинг биринчи хатбошиси Ўзбекистон Республикаси Вазирлар Маҳкамасининг 2016 йил 26 апрелдаги 122-сонли қарори таҳририда — ЎР ҚҲТ, 2016 й., 17-сон, 176-модда)
Бунда хўжалик ҳисобидаги корхоналар (бирлашмалар)да ва ташкилотларда компенсация тўлаш хизмат енгил автомобилларини сақлаш учун фойдани тақсимлаш сметаларида назарда тутилган, корхоналар ва ташкилотлар ихтиёрида қолдириладиган маблағлар ҳисобига амалга оширилади.
Олдинги таҳрирга қаранг.

4. Компенсация автомобиллар моторининг от кучи сонига қараб қуйидаги миқдорларда тўланади:
От кучи сониБир ой учун компенсациянинг чекланган миқдори
100 от кучидан юқори

Базавий ҳисоблаш миқдорининг 4,5 баравари

70 от кучидан 100 от кучигача

Базавий ҳисоблаш миқдорининг 3,5 баравари

70 от кучигача

Базавий ҳисоблаш миқдорининг 2 баравари


Компенсация миқдорлари ходимга фақат хизмат мақсадлари учун фойдаланиладиган автомобилни ишлатиш юзасидан қилинадиган харажатларни қоплашни ҳисобга олган ҳолда белгиланган.
(4-банд Ўзбекистон Республикаси Вазирлар Маҳкамасининг 2019 йил 28 декабрдаги 1046-сонли қарори таҳририда — Қонун ҳужжатлари маълумотлари миллий базаси, 29.12.2019 й., 09/19/1046/4242-сон)
5. Корхона, муассаса ва ташкилот раҳбарининг буйруғи хизмат мақсадлари учун ўзларининг енгил автомобилларидан фойдаланувчи ходимларга компенсация тўлаш учун асос бўлади. Корхона, муассаса ва ташкилот раҳбари ишлатиш шароитларига қараб компенсациянинг чекланган миқдорини кўпи билан 10 фоизга оширишга ҳақлидир.
Корхоналар, муассасалар ва ташкилотлар раҳбарлари томонидан компенсацияни тўлаш юқори ташкилотнинг рухсати билан амалга оширилади.
Компенсация олиш учун ходимлар корхона, муассаса ва ташкилот бухгалтериясига шахсий автомобиль техник паспортининг белгиланган тартибда тасдиқланган нусхасини тақдим этадилар.
6. Компенсация ойига бир марта, календарь кунларнинг сонидан қатъи назар, ойнинг иккинчи ярми учун иш ҳақи билан бир вақтда тўланади.
Ходим таътилда, хизмат сафарида бўлган, вақтинчалик меҳнатга лаёқатсизлиги туфайли, шунингдек, у бошқа сабабларга кўра ишга чиқмаган, шахсий автомобилдан фойдаланмаган вақтлар учун компенсация тўланмайди.
Олдинги таҳрирга қаранг.

7. Ушбу Тартибнинг 4-бандида кўрсатилган нормалар доирасидаги компенсацияга солиқ солинмайди ва ўртача иш ҳақини ҳисоблаб чиқишда ҳисобга олинмайди.
(7-банд Ўзбекистон Республикаси Президентининг 2013 йил 25 декабрдаги ПҚ-2099-сонли қарори таҳририда — ЎР ҚҲТ, 2013 й., 52-сон, 690-модда) Манба Lex.uz
23-11-2020, 19:03
Вернуться назад